Son Mauro Trastoy, artista visual cunha ampla traxectoria que podes coñecer en www.trastoy.com. Nas Aulas Trastoy propoño un espazo creativo para crianzas de 6 a 12 anos, onde cada sesión é unha aventura para explorar, experimentar e gozar facendo.

Traballamos con técnicas como o collage, o estampado, a escultura con refugallos, o debuxo con tinta ou a creación de obxectos efémeros. Utilizamos materiais artísticos, reciclados e tamén elementos da natureza. Ás veces facemos proxectos individuais, outras veces colaborativos, sempre respectando o ritmo e os intereses de cada crianza.

O obxectivo é cultivar a liberdade, a imaxinación e o pracer de facer coas mans, nun ambiente seguro, alegre e sen presións, onde crear sexa sempre unha experiencia para gozar.